009 - Muhammes [Ne hengâm-ı safâ-yı 'işret-i mül gibi bir dem var]

-I-
1    Ne hengâm-ı safâ-yı 'işret-i mül gibi bir dem var
2    Ne sâz-ı mutrıb-âsâ cân-fezâ-yı mürde-i gam var
3    Ne mânend-i hayâl-i yâr bezm-i dilde mahrem var
4    Ne câm-ı bâde-i gül-gûna benzer yâr-ı hem-dem var
5    Ne sadr-ı gûşe-i mey-hâne gibi cây-ı hurrem var
-II-
1    Leb-i mey-gûn-ı sâkî yâdına cûş eyleyüp ey dil
2    Ciger hûn-âbesin demdür olursam nûş idüp kanzil 
3    Gerekmez 'akla yâr olmak hârâbat ehli ve'1-hâsıl
4    Beni 'ayb eylemen dâ'im olursam mest-i lâ-ya'kil
5    Ki bî-hûş olmasam âsûde kılmaz bende bir gam var
-III-
1    Beni ol kaşı ya ger atmasa yâbâna tîr-âsâ
2    Kesilmezdüm yanından bir nazar hançer gibi kat'â
3    Dem-i fürkat degüldür kavl-i muhtâr-ı ulü'1-ârâ
4    Gam-ı hicrânda hâlet var dimişler ehl-i derd ammâ
5    Mülâyim dil-ber-i şûhun dem-i vaslında 'âlem var
-IV-
1    Görem diyü seni a'yân-ı erbâb-ı nazar her gün
2    Kapundan halka-i der gibi gitmez çeşm-i ter her gün
3    Tolanur peyk-i âhum kûyunı şâm u seher her gün 
4    Ruhun bâgın rakîb-i dîv-sîret seyr ider her gün
5    Yüzüni göremez yıllarca ammâ bunda âdem var
-V-
1    Sıyup seng-i havâdis yine câm-ı bezm-i 'uşşâkı 
2    Elin çekse kadeh sunmakdan erbâb-ı dile sâkî 
3    Perîşân olsa cümle defter-i eş'ârun evrâkı 
4    Safâ-yı safvet-i tab'un yiter eglence ey Bâkî 
5    Bi-hamdi'llâh ne gam yirsin elünde sâgar-ı Cem var