077 - Hûnî göz ile ol müje vü ebruvânı gör

1    Hûnî göz ile ol müje vü ebruvânı gör / Tîr ü kemân elinde iki Türkmânı gör
2    Hatt-ı siyâh u turra-i 'anber-feşâna bak / Evvel zuhûr-ı fitne-i Âhir zamânı gör
3    Çekdi kapun gedâlıgına 'âkıbet saçun / 'Ömr-i dırâz u saltanat-ı câvidânı gör
4    Aldanma câh u bahtına kalmaz bu rûzgâr / Bâg u bahârı n'eyledi bâd-ı hazânı gör
5    Pîrâne-ser elünde 'asâ-veş piyâle tut / Nâ-geh tokınsa bâd-ı havâdis tayanı gör
6    Zahm-ı hadeng-i âh ile deldüm şu denlü kim / Kef-gîre döndi günbed-i heft âsmânı gör
7    Devrinde kimse görmedi emn ü selâmeti / Uydı zamâne tavrına ol bî-emânı gör
8    Bâkî cemâl-i şâha nigâh eyle aç gözün / Çeşm ü çerâg-ı dûde-i 'Osmâniyânı gör
9    Şâh-i bülend-kevkebe mâh-ı felek-cenâb / Sultân Murâd Hân-ı sipihr-âsitânı gör
10    Tîr-i cefâ-yı çarh-ı sitem-gerden inleme / Şemşîr-i 'adl-i husrev-i sâhib-kırânı gör